नेपाल एसिसी यु १६ को फाइनलमा

काठमाडौं, वैशाख २९ म्यान अफ दि म्याच जगदिश चन्दको अलराउन्ड प्रदर्शनको मदतले नेपालले शुक्रबार एसिसी यु १६ को फाइनलमा पुगेको छ ।मलेसियामा जारी प्रतियोगिताको फाइनलमा नेपालले सिंगापुरलाई १ सय १ रनको विशाल अन्तरले हराउदै फाइनलमा पुगेको हो ।
पहिला ब्याटिङ गर्दै नेपालले जगदिश चन्दको ५३ तथा नुरध्वज सेनको ५१ रनको मदतले निर्धारित ४० ओभरमा नौ विकेटमा २ सय ४० रनको योगफल तयार पारेको थियो। 
प्रत्युत्तरमा सिंगापुरको टिम ३६ दशमलव ५ ओभरमा १ सय ३९ रन बनाएर आउट भयो। सिंगापुरका ए गोएन्काले ३८ तथा भि शेषाद्रीले ४६ रनको योगदान दिएका थिए। 
नेपालका लागि जगदिश चन्दले २८ रनको बदला तीन विकेट झारेका थिए भने आशिष विष्टले तीन विकेट झार्ने क्रममा २४ रन दिएका थिए।
नेपालले अब आइतबार उपाधिका लागि हुने भिडन्तमा आयोजक मलेसियाको सामना गर्ने छ । मलेसियाले सेमिफाइनलमा ‌ओमानलाई ३६ रनले हराएको थियो ।