बन्दका क्रममा तीन जना घरेलु हतियारसहित पक्राउ

चितवन, वैशाख २९

- बन्दका क्रममा अराजक गतिविधि मच्चाउन खोजेको भन्दै प्रहरीले तीन जनालाई घरेलु हतियारसहित भरतपुरको चौबीसकोठीबाट पक्राउ गरेको छ। मोटरसाइकलमा आएका युवाको समूहलाई शङ्का लागि जाँच गर्दा उनीहरूको साथमा रहेको रडसहित पक्राउ गरेको चितवनका प्रहरी प्रमुख भुपालकुमार भण्डारीले बताउनुभयो।पक्राउ पर्नेमा रत्ननगरका लोकनाथ पौडेल, रमेश पौडेल र गणेश पौडेल रहेका छन्। मोटरसाइकलमा आएका उनीहरूमध्ये अन्य भागेको प्रहरीले जनाएको छ। बन्दमा अप्रिय घटना नहोस् भन्नका लागि स्थानीय प्रशासनले सुरक्षा व्यवस्था कडा पारेको थियो। जिल्लामा सवारी साधन, बजार, शिक्षण संस्था, कलकारखाना पूर्ण रूपमा ठप्प भए।यसैबीच चितवनका प्रमुख जिल्ला अधिकारी गणेशराज कार्कीको अध्यक्षतामा बिहीबारै यहाँ बसेको सर्वपक्षीय बैठकले जातीयता सद्भाव खलल हुन नदिन सबैमा अपिल गरेको छ।