सावधान ! यदि तपाईं लुटले पैसा र नाम कमायो अनि अब हामी पनि हाम्रै देशमा सिनेमा देखाउनुपर्छ तथा एउटाले सक्यो भने अर्काले किन नसक्ने भनेर सोच्दै हुनुहुन्छ भने तपाईं गलत हुनुहुन्छ । लुट चल्नु पछाडि थुप्रै कारणहरू छन् । प्रमुख कारण हो –सिनेमा आफैमा राम्रो हुनु । नेपालमा बसेर विदेशको बजारका ठूला–ठूला कुरा गर्ने व्यक्तिहरू आज नेपालमा असफल भएको सिनेमा विदेशमा रिलिज गर्दैछन् । के पैसा नै ठूलो कुरा हो त ? सिनेमा नराम्रो छ भनेर थाहा हुँदा–हुँदै के ती सिनेमाहरू विदेशमा रिलिज गर्नु के राम्रो काम हो ?
धन्यवाद छ, इभेन्ट आयोजकहरूलाई जसले नेपाली सिनेमाको बजार नेपाल बाहिर पनि भनेर प्रमाणित गरेर देखाइदिए । अष्ट्रेलियामा लुटपछि सिनेमा रिलिज हुने वातावरण बनेको छ । सुनिएअनुसार नेपालमा लगानी उठाउन नसकेका सिनेमा साथी म तिम्रो र आइएम सरीका अभिनेताहरू अष्ट्रेलिया जाँदैछन् । हाँसो उठ्दो कुरा के छ भने, जुन अभिनेता जसले नेपालमै सिनेमाको ब्यापार सुनिश्चित गर्न सकेनन्, के उनले अष्ट्रेलियामा सिनेमाको ब्यापारलाई सुनिश्चित तुल्याउन सक्लान् ?
हामी आफैले बनाउने भनेको विश्व बजार किन बिगारिरहेका छौं ? हामीले एकपटक गम्भिर भएर सोच्नुपर्ने भएको छ । हामी छोटो समयमै नाम र दाम कमाउन चाहन्छौं र आफैले बोलेको जस्तो साँच्चिकै सिनेमाको विकासका लागि सहयोग गर्न चाहन्छौं । लुटपछि जति पनि सिनेमा रिलिज हुन्छन् र हुँदैछन् यी सबै असफल हुने निश्चित छ । नेपालमा असफल भएका सिनेमा विदेशमा रिलिज गर्नु के सहि काम हो ? लुटबाट धेरै कुरा सिक्नुपर्छ ।
विदेशमा व्यस्त जीवन बिताइरहेका नेपालीहरू मानिसलाई हेर्न होइन, सिनेमा हेर्न आउँछन् । तपाईं आफ्नो पहिलो इभेन्ट नै अन्तिम बनाउन चाहनुहुन्छ ? जुन विश्वासले तपाईंले बोलाएका मान्छेहरू तपाईंले आयोजना गरेको सिनेमा हेर्न आउँछन्, सोच्नुस –कति निराश हुन्छन् उनीहरू, यदि तपाईंले सम्बन्धलाई ब्यापारमा प्रयोग गर्नुभएको र धोका दिनुभएको थाहा भयो भने । अहिलेको समय प्रतिस्पर्धा गर्ने होइन सबै मिलेर हातेमालो गर्ने हो । अरुले सिनेमा रिलिज गरे, म पनि गर्छु भन्दापनि उसले राम्रो सिनेमा रिलिज गर्यो, म यो भन्दा पनि राम्रो सिनेमा रिलिज गर्छु र सबैको पैसा असुल हुने गरी मनोरञ्जन दिन्छ भनेर सोच्नु अहिलेको आवश्यकता हो ।
No comments:
Post a Comment