अश्लिल सिनेमालाई रोकियो अनुमति

कतै तपाईँ अश्लिल लाग्ने खालका सिनेमा निर्माण गर्दै त हुनुहुन्न ? यदि हुनुहुन्छ भने पख्नुस । तपाईँले निर्माण अनुमति नपाउन पनि सक्नुहुन्छ । अश्लिलजन्य सिनेमा निर्माणको क्रम बढेपछि चलचित्र विकास बोर्डले त्यस्ता सिनेमालाई निर्माण अनुमति दिन रोकेको छ । पछिल्लो सातादेखि बोर्डले निर्माण अनुमति दिन निकै कडाइ गरेको छ ।

 

 

 

अध्यक्ष गणेश भण्डारीले सिनेमाको संरचना र बजार नबुझिकनै निर्माणमा हात हाल्न लागेका र अश्लिलजन्य चलचित्र निर्माणको क्रम बढेपछि यस्तो व्यवस्था गरिएको बताए । सिनेमा दर्ता गर्न स्क्रिप्ट लिएर बोर्ड पुग्ने निर्माता र निर्देशकलाई बोर्डले पहिलो चरणमा परामर्श दिन थालेको छ । काउन्सिल चरणमा निर्माताको सिनेमाबारेको अनुभव र ज्ञान बुझिनेछ । दोस्रो चरणमा गोप्यरुपमा बोर्डले गठन गरेको समितिले स्क्रिप्टको अध्ययनपछि उपयुक्त ठहराए मात्र निर्माण अनुमति दिइने नयाँ व्यवस्था गरिएको छ । 

पछिल्लो समय अनुभवी निर्माताले समेत निर्माण इजाजत पाउन सकेका छैनन् । अध्यक्ष भण्डारीले यस्तो व्यवस्थाले बुझेका र अनुभवी निर्मातालाई प्रोत्साहन हुने बताए । अश्लिल सिनेमा निर्माणमा रोक लगाउन यस्तो व्यवस्थाले सघाउने उनले बताए । सिनेमाको माग र आपूर्तिको सन्तुलन मिलाउन निर्माण इजाजतमा कडाइ गरिएको उनको भनाइ छ । स्क्रिप्ट अध्ययनको समितिको संरचना र नाम गोप्य राखिएको छ । 

बोर्डले हालै सार्वजनिक गरेको दस बुँदे नीति तथा कार्यक्रममा सिनेमा निर्माण व्यवस्थापन गर्ने कार्यक्रम समेटिएको थियो । यही कार्यक्रमअन्तर्गत रहेर बोर्ड निर्माण इजाजतमा अनुदार बनेको हो । बोर्डको यो कार्यक्रमले अश्लिलजन्य सिनेमा निर्माणको तयारीमा रहेका निर्माता र निर्देशक हतोत्साही हुने अपेक्षा गरिएको छ । सामाजिक मर्यादा प्रतिकूलको कथाका सिनेमालाई बोर्डले अश्लिल भनेको छ ।